Badjeolbmuide buhttejuvvojit 157 sadjásašveahkkediimmu jagi 2025
Sosiála- ja dearvvašvuođaministeriija lea 9. juovlamánu nannen badjeolbmuide buhttenvuloš sadjásašveahkkediimmuid eanemusmeari jahkái 2025.
Jagi 2025 badjeolbmuide buhttejuvvojit eanemustá 157 sadjásašveahkkediimmu badjeolbmo nammii. Go badjeolmmoš lea ordnen alcces sadjásašveahki, das buhttejuvvojit eanemustá 20,87 euro ovtta diimmus jagi 2025.
Sadjásašveahkkebuhtadusaid mearreruđa eanemusmearri lassána 50 000 euroin jagis 2024, nu ahte jagi 2025 dat lea 500 000 euro. Daningo sadjásašveahki geavaheapmi árvvoštallama mielde lassána maid jagi 2025, de buhttenvuloš diimmuid eanemusmeari leat goittotge gártan geahpidit jagi 2024 ektui.
Jos sadjásašveahkkevuogádahkii boahtá ain lasseruhtadeapmi jahkái 2025, de lea vejolaš, ahte sosiála- ja dearvvašvuođaministeriija ásahus sadjásašveahki eanemusmearis rievdaduvvolii ja eanemusdiimmuid mearri lasihuvvolii jagi 2025 áigge.
Loga eanet sosiála- ja dearvvašvuođaministeriija dieđáhusain: Boazodoalliid sadjásašveahkkediimmuide nuppástus jahkái 2025
Lassedieđut
áššedovdi Marja Antola, tel. 029 435 2275
