Boazodoalli, amma leat oadjudan iežat barggu?
Go barggat bohccuiguin iežat, bearašlahtu dahje bálgosa lohkui, de du bargoealáhatdorvvu vuođđun lea MYEL-ealáhatoadju eanadoallofitnodatdolliid ealáhatlága mielde.
Oadjuduvvon boazodoallobargun lohkkojuvvojit iežas bohccuiguin bargama lassin bargu, mii dahkkojuvvo bálgosii, dego bohccuid guođoheapmi, šiljoáiddis dikšun ja rátkin, bohccuid njuovvan ja mearkun, áidebarggut ja lassin boazoisida ja ruhtadoalli barggut. Lassin bálgosa rehketdoalu olggobealde dahkkon bargu, earret eará bohccuid čohkken áidái, dálvefuođđariid čoaggin ja vuorkun ja bigálastinbarggut gullet seamma ládje MYEL-oadjudeapmái.
MYEL-oadjudeapmi stuorruda bargoealáhaga. Dán lassin oaččut Melas bártedorvvu bargo- ja astoáiggi bárttiid várás. Dutnje lea vejolaš oažžut maiddái Mela-buohcanbeaiveruđa buohcanoadjudeami iežasvástoáiggis ja boazodolliid sadjásašveahki ja eará ovdduid.
Dorvu maiddái du bearašlahttui
Go du guoibmi dahje ovttasorru oassálastá bearraša bohccuiguin bargamii bálgosis dahje dan olggobealde, son sáhttá oadjuduvvot Melas. Jos du guoimmis leat iežas lohkobohccot, de son oadjuduvvo fitnošeaddjin. Maiddái du bearašlahtu sáhttá dihto eavttuiguin oadjudit, son son oassálastá boazodoallobargguide.
Oadjudeapmi vuođđuduvvá bargodietnasii
MYEL-oadjudeami vuođđun lea du jahkásaš MYEL-bargodienas. Bargodienas meroštallá, man olu dutnje čoggo ealáhat du boazodoallobarggus. Dan vuođul meroštallojuvvo maiddái, man olu oaččut ovdduid ja buhtadusaid ja mávssát oadjomávssuid.
Bargodienas hápmašuvvá lohkobohccuid, boazobargobeivviid ja bohccuid šiljoáidedikšunbeivviid mielde. Bargobeivviide rehkenastojuvvojit sihke bálgosa rehketdollui merkejuvvon beaivvit ja rehketdoalu olggobealbargu.
Bargodietnasii váikkuhit
- lohkobohccuid mearri
- bálgosis dahkkon bargobeaivvit
- bálgosa rehketdoalu olggobealbargu
- šiljoáiddis dikšojuvvon bohccuid mearri ja šiljoáiddis dikšuma áigi
- boazoisida ja ruhtadoalli bálká
- laktojuvvon dienas dan dáfus go dat ii gehččojuvvo eará fitnodaga dienasin
Okta lohkoboazu addá jahkásaš bargodietnasa 36,11 euro ja okta bargobeaivi 72,21 euro (jagi 2024).
Jos du bargodienas lea unnimustá 4 506 euro jagis (jagi 2024), de don oadjuduvvot bákkolaš MYEL-oadjudusain. Jos du bargodienas báhcá vuollel bákkolaš oadjudeami ráji, de sáhtát váldit MYEL-oaju eaktodáhtolažžan ja stuorrudit nie ealáhaga maiddái iežat boazobarggus.
Fuolat iežat oadjudandorvvu ortnegii!
Mii leat čielggadeame bálgosiid boazologahallamiid vuođul boazodolliid oadjudeami. Mii sáddet oktavuođaváldinbivdaga boazodolliide, geat jagi 2023–2024 boazologahallama mielde oamastit bohccuid ja geat barget bálgosii dan meare, ahte oadjudeami eavttut divvet, muhto geain ii vel leat bargoealáhatoadju Melas.
Jos barggat bohccuiguin iežat dahje bearašlahtu lohkui dahje bálgosii, muhto dus ii vel leat leat MYEL-oadju, de válddestivččetgo oktavuođa Melai dahje Mela-áššeolbmui, de mii čielggadit du oadjudangeatnegasvuođa: Oktavuođadieđut
Loga lasi boazodoalli oadjudeamis: Mela-dorvu iešguđet eallindillái
